امریکا جنوبی کوریا مشترکہ مشقوں کا جواب ،شمالی کوریا کا شارٹ رینج بیلسٹک میزائلوں کا تجربہ

شمالی کوریا نے امریکی وزیر خارجہ کے دورہ جنوبی کوریا کے موقع پر بیلسٹک میزائلوں کا تجربہ کیا ہے۔نجی ٹی وی جیو نیوز کے مطابق غیر ملکی میڈیا نے بتایا کہ شمالی کوریا نے شارٹ رینج بیلسٹک میزائلوں کا تجربہ کیا ہے جو اس نے مشرقی سمندر کی جانب سے فائر کئے۔امریکی فوج کے جوائنٹ چیفس نے شمالی کوریا کے میزائل تجربے کی تصدیق کرتے ہوئے کہا کہ شمالی کوریا نے مشرقی ساحل کی طرف کچھ بیلسٹک میزائل فائر کئے ہیں، عام طور پر اس ساحلی پٹی کو جاپانی ساحل کہا جاتا ہے۔جاپانی کوسٹ گارڈز نے بھی شمالی کوریا کے میزائل تجربے کی تصدیق کی اور کہا کہ میزائل پہلے ہی اپنے ہدف پر گرچکے ہیں۔میڈیا رپورٹس کے مطابق شمالی کوریا کی جانب سے میزائل تجربے ایسے موقع پر کئے گئے ہیں جب امریکا اور جنوبی کوریا اپنی 11 روزہ مشترکہ فوجی مشقیں ختم کررہے ہیں جبکہ امریکی وزیر خارجہ انٹونی بلنکن نے جنوبی کوریا میں ہونے والی ڈیموکریسی سمٹ سے خطاب بھی کرنا ہے۔شمالی کوریا، امریکا اور جنوبی کوریا کے درمیان مشترکہ فوجی مشقوں کی مذمت کرتا آیا ہے اور اس کا مو¿قف ہے کہ یہ مشقیں مداخلت کی تیاری ہے۔شمالی کوریا نے اس حوالے سے امریکا اور جنوبی کوریا کو خبردار بھی کیا تھا کہ وہ اس طرح کی مشترکہ فوجی مشقوں کی بھاری قیمت ادا کریں گے۔رپورٹس کے مطابق جنوبی کوریا میں ہونے والی ان مشقوں میں حصہ لینے کے لئے 27 ہزار امریکی فوجی وہاں موجود تھے۔